För mien Modder Heike, de siet mehr as fiefundveerdig Johr de Krögersche inne Kotzenbüller Kroog is
Für meine Mutter Heike, die seit über fünfundvierzig Jahren die Gastwirtin im Kirchspielkrug Kotzenbüll ist
He weer toreist, much keen Kinner, Hunnen un Schaap. Bös slechte Vörbedingungen, wenn een in Kotzenbüll blieven und dor glücklich warrn wull. Besunners denn, wenn dat Lengen weer, een sinnige torüchtrocken Leeven to hebben un nich bi de Geselligkeit vunne Dörpsgemeenschaft mittomaken.
Erwin Wurst weer vör twee Johrn ut Berlin totrocken. Dor weer sien Tonaam gang un geev ween. Hier makten de Kinner Spijöökens mit sien Naam.
He harr dat smucke oole Reitdackhuus langsiets vun dat Küsterhuus köfft. Inne Wahnung mit de Döör na Südoosten hüüste he sülmst. De anner Wahnung mit de Utgang na Nordwest vermedete he an Feriengäste, man blots an Minschen 50+ ahn Kinner. He seet geern op de Wisch ünner de bannig groote oole Eekboom vör't Huus. De Kinnerspeelplatz direkt op de anner Siet vunne Straat weer em towedder.De weer he vör de Husskoop ni wieswurn.
Man Erwin Wurst weer 'n Minsch vun't Amt wesen un kennte sik mit de Gesetten ut. So beschwerte he sik jümmers, wenn frielopen Hunnen över sien Grund stromerten, de Navers de Middagsruh ni achteten oder gar anne Sünndag de Raasen meihten. Dat de Buern ok an't Weekenn mit sees Treckers dör't Dörp fohrten argerte em, man dorgegen kunn he nix maken.
De Kinner peesten wiederhenn in oole Wennst – as ok al sees Öllern un Grootöllern vör se – över sien Grund, ween se Schnitzeljagd speelten. Dat weer de körtste Weg na de Kroog un de Fenn dorachter, wo de Versteeken dicht bi de Bundesstraat weern. As ok al ehrn Öllern un Grootöllern weer se dat verbaden, anne Bundesstraat to speelen, man hier weern nu mal de besten Versteeken, wenn de Sökende sik anne Gebotte vun de Grooten heel un wiet vunne Bundesstraat wegbleev. Av un an kladderte ok mal een Kind inne Telgen vunne oole Eekboom to sik dor to versteeken. So männingmal seeten dor de Halfstarken, to sees eerste Glimmstengels to smöken, as ok al annern in dat halve Johrhunnert vör se.
Erwin Wurst versöchte se dat Leeven swor to maken, wenn he se tofatenkreeg, man meist weern se to flink. Blots de acht Johr oole Leonie kreeg he af un an mal bi de Büx. Ofschoonst se dree Johr jünger weer als de jüngste vun se, leeten de grooten Bengels ehr mitspeelen, wieldat dat keen Kinner in ehr Öller geev. Wenn Erwin Wurst ehr tofatenkreeg, schaffuterte un ehr drauhte, weer Leonie böös bang. Ok weer dat Speel denn för ehr jümmers toenn. Se kunn sik ni bitieden versteeken un wurr fungen, muss denn bit to'n Enn vun't Speel inne Hütt op't Speelplatz sitten, wieldat de Jägers op dat Kittjen jümmer so inhöden, dat keen een rutholt warrn kunn.
Inne vörige Weeken weer Erwin Wurst 'n beten torüchhollern wurrn. Dat harr böös Schererien geeven as he een Köter op sien Grund mit Lebberwust in sien Huus lockt un dor för veele Stünnen fastholn harr. Veele Inwahner vun't Dörp weern middewiel fuchtig op em. Ok weern se vergrätzt, wiedat de Besök vun Erwin Wurst jümmers de halve Dörpsstraat toparkte. De veelen Wagen argerten de Inwahner vun't Dörp, besunners denn wenn mal wedder eener vunne Besöker een Schaden ersett hebben wull, wieldat een verbiesterte Football de Lack vun't Auto ramponeert harr. Wurst harr farken veele Besöker. He geev Kakünnerricht in sien Huus un gung inne Harvst alleen oder mit sien Besök to Poggenstöhl to söken. De Poggenstöhl wurrn jümmers buten benaamt un putzt. De Kinner hörten em mal seggen, dat he ni ut Versehn mal een giftige Poggenstohl in sien Köök laten wull, deswegen keek he bi sien Besök jümmers genau henn.
Nadem he 'n poor Dage wull krank wesen weer, knapp ut Huus rutkamen weer, wenn Hunnen order Kinner över sien Grund jachterten, harr he sik wedder verpuustet. Hüüt seet he stünnenlang in sien Goorn, harr 'n Book inne Hand un beweegte sik knapp. De Kinner beluurten em vunne Speelplatz ut un besloten, bi't Football speelen op de Ball optopassen un em wenn't geiht nich över't Tor up de Grund von Erwin Wurst to scheeten. 'N halve Stünn lang gung dat goot, man denn schoot Florian, de öllste vunne Jungs, veele Meter över't Tor röver un de Ball lannete een Meter bisiets von Erwin Wurst. Dat weer gediegen: He röhrte sik ni un bleev kommodig sitten. Dat makte den Kinners binah mehr bang as een fünnsche Erwin Wurst un se överleegten, as wodennig se de Ball torüchkriegen schulln.
Na 'n heele Tied makte Florian sik op de Weg, letzten Enns weer he ja de Schullige. Sinnig gung he na Erwin Wurst röver un de Kinner weern baff, wieldat de Kirl liekers kommodig sitten bleev. Mit Mal bleev Florian verfehrt stahn, blöckte luut un rennte denn na de Kinner torüch.
De fix hentoropen Vadder reep dat Noothelpauto, ofschoonst he keen Moot harr. Erwin Wurst schiente musedod to ween.